هى دى هى (مصر يا عنيا )

تلك مصر بكل مميزاتها التى اراها وان لم تكن الصوره كامله لكنها مظلومه

وصفا وعملا من اولادها او من اهمالنا لها او بعيون الحساد اللى راصده شعبها .....

وانا ابن من ابنائها وحاسس بأنينها وبتكلم عنها

" هذه مصر "

أناإسمى مصراوى ومصر يعنى أرض النيل

جهد وعرق وسواعد وغنا ومواويل

مصر يعنى طيرها لعدوها فى جوها أبابيل

مصر يعنى بحرها فى كربها أساطيل

مصر فى طبيعه نبتها سلسبيل وأصيل

وكل مصرى بجد على جبينها توضعه إكليل

ولاد مصر فى كل عصر وبدون حصر سطروا إنجاز

علم وأدب وشطاره ولا الاعجاز

منهم زويل والمولد وكمان الباز

ونجيب محفوظ فى أدبه وحكاويه أعظم أستاذ

والفيلسوف المتدين شعراوى من الأفذاذ

على حب مصر أكتب وأحَّكى وأقول

ولا ألف بيت يٍِِدّوا مصر حق الشمول

على حب مصر أنشد أفضل الحكايات

وعن ولاد مصر أسرد أجمل الروايات

هنا الشهامه والكرامه يتعد منها بالألوفات

وكأنها اتخلقت للشعب ده بالذات

.........

بنسبها ونحن لها لأننا بنحبها

لأنها منا واحنا منها

بنسب الظلم اللى طافح على ظهرها

لأنه بالطبع مش نابع من قلبها

أو بالأحرى ولادها اللى غربا عن أرضها

اللى بعاد عن مبادئها وشكلها وعرفها

زرع شيطانى متعرفش منشأه من أى حته منها

بدل ما ياخد منها حبها وينظر لجمال جيدها وعُقْدها

شَكِّل الكلمه بشكل تانى فأصبحت عُقَدْها لا عقدها

ولكن بنحن لها ....لأننا بنحبها

وفى ضيقتها بنتجمع عشانها كلنا وبرده لها

بنفتكر وقعتنا وقو متنا واحنا بنلعب على ارضها

بنفتكر لعبنا وضربنا لبعضنا بطينتها ورملها

على شطها نرمى همومنا وما نطلب ردها

طفولتنا وطيبتنا اللى نمت على نبتها

رجولتنا وكرامتنا اللى اتسقت من صلبها

ولكن ..بنحن لها

المصرى شديد وحديد عز جنب ارادته ...ارادته تفتها

المصرى من كتر شاف واسى من قساوتها وحبها

بيسخر من الأهوال وينكت على أمَّها

مصر

... الوجه الاخر

شكوت إلى مسئول سوء همى وكم غمى

وقلتله أنا اتنكدت وأكتر من قدرتى اتحملت

هتقولى يا ابنى هو انت لسا رحت ولا جيت

دا أنت من الكليه للبيت

هقولك ما أنا لو رحت بره مش راجع ليها تانى

يمكن فى لهجتى مش هادى وان كان دا هو العادى

هتقوللى وانت عاوز ايه هقولك يا بيه

:

أنا عاوز أسكن فى المعادى

وأعيش حياتى عادى

هاروح أزور النادى ورتحل للبوادى

هروح السيتى مول

وأمشى مع كعبول

وناس بتضرب تقلب وناس بتاكل فول

وناس القانون ليها معمول

وناس بتاخد على أفاها بالنعول

هشترى أنتيكات وأمشى مع البنات وناس مش عارفه تتنفس

وبتموت فى اليوم مرات ...........

وصوتها مش طالع ومش واصل ونافع وفى حلقها بتموت أهات

وأنفاسها بتطلع مقهوره فى شكل زفرات

وناس تانيه همها الفانيه ولانافعه معاها مواعظ ولا كلمات

ناس بتحط جيل

وناس حياتها فِل فى فِل (او لو تسامحونى :جِل فى جِل )

كله بقى قرفان والكل بيهاون ويماين وان كان هو الحقان

لأنه عارف ان حقه مش ليه وهيتمد على رجليه لو حد من الكبار وصى حد عليه

لانه من الصغار هينضرب على بطنه وكمان على ايديه

واللى ملوش ظهر فى البلد دى هيتعلم عليه

هنهج ونسيبها لولاد الذين ***

يعيشوا لوحدهم والفوضى تلمهم وبلاش نِسِبُّهم

هيموتوا بجهلهم وفى القبر لحدهم

يطهر لسانهم فعالهم كدبهم

يرغم أنفهم ويجيبها التراب وان كان التراب منهم

نغصوا علينا دنيتنا وكرهونا فى حياتنا

وهيعجلوا بموتنا لو كان بالاختيار

فالفوضى بقت شعار

هقولك ازاى فى كذا حته احنا محتاجين فيها ضرب النار

الواحد يدخل المستشفى يطلع بلا كليته

وان جه يشتكى مين هيوصل شكوته

وهل بعد ما يشتكى هيمسحوا دمعته

ولا هيعقدوه ويزودوه نكبه على نكبته

ولا ممكن يأرفوه بحاجه تسكته

ولا يمشوله حاجته لأن الامر وصل ذروته

أو لأن مسئول كبير متابعه على رمته

ومين اللى يدرى ان اللى حصل ما يتكررش مع اخوته

وايه اللى كان هيحصل لو موصلش لحد يوصل شكوته

وهو الحق فى البلد دى محتاج لواسطه كبيره علشان تبان قوته

على كده محتاجين ألوف من البيت بيتك وحديث المدينه علشان ما نفوته

مشكله الشعب إنه بيعانى من حاجات من غيرها ما يعيش

رغيف العيش وزحام المواصلات اللى حالنا فيها زى الجبنه القريش

زحام واحنا رايحين

وخنقه واحنا راجعين..

وفى النص بنجرى وراها وبرده منلاقيش

ولا الرياضه اللى حالتها محتاجه انتفاضه

نسيب الأبطال الفرديين اللى حاطين صوره مصر على الافيش

اسكواش ومصارعه وكمال أجسام دعمها مفيش

امكانيات بأقل ما يمكن والبطل راضى يعيش

ولما ينجح نعمله هالومه ومولد ولما ينفض هتدور متلاقيش

ونفضل نجيب الغلط على بعض وأخرتنا فى العيد قراقيش

مسئول ينفى ولا عب ينعى وعلى دا الحال احنا بنعيش

كره القدم أهلى وزمالك وكأن غيرهم مفيش

وغيرهم لو عنده نص اللى عندهم هيعديهم زى الدراويش

المنصوره وانبى والحرس وبتروجيت وكمان الشواكيش

وفى الأخر سمعه مصر هى المضروبه و يا أبو الريش ان شاء الله تعيش

وأغانى وكلمات هابطه علشان اتحمل بعمل لدماغى رابطه

لكن المشكله انها بقت فى الاوساط الراقيه مرتبطه

والعنب ولا الحمار وأه يا نارى أه يا نارى

أنا من رأيى على خيبتنا ندارى

ولا الاعلانات الغريبه ..

اللى بتضيع وقتنا

أو تبتز فلوسنا وتضحك على دقننا

أسئله غبيه هدفها انها تاخد فلوسنا مننا

أو تتوه عقولنا أو تبلد فكرنا

زى : هل الكلمه اللى تتناسب مع الحاج هى كنتاكى ولا منى

ارحمونا بقى وسيبوا الشعب يعيش

وزى ما قلت كفايه عليه ياكل فى العيد قراقيش

وان لقاه وما استلفش من اللى يسوى وما يساويش

وكل سنه وانتم طيبين ....والعيد فرحه ...ماء ولا غباء ؟!!

الله على الكلام الجميل اللى بيعبر عن

مكنون كل المصريين..الله الله

بلدنا حلوه..جميله..حنينه

طيبه زى اهلها

وان كان فيه بعض المسؤولين مش على مستوى المسؤوليه

فهم برضه مصريين..مننا واحنا منهم..ندعى لهم

ان ربنا يهديهم للصواب..ويقدرنا على الصبر

دوام الحال من المحال..ولابد

لليل ان ينجلى

:222:

:210:

مشاركه رائعه يانايوشا

وتم تثبيت الموضوع اكراما لرأيك

شكرا لكما