حكمت المحكمة على لجنة الدستـــــــــــور

آهى حكمت المحكمة على لجنة الدستـــــــــــور
وعرفنا مين اللى كان فى المجلسين مغـــــــرور
واللى افتكرناه هايبقى شيخ وحقانــــــــــــــــــى
طلع بشحمه ولحمه هو (فتحى ســــــــــــرور)

اهى حكمت المحكمة وانكشف المستـــــــــــــور
فى اللجنة طلع "الكتاتنى" وغيره مالهوش دور
وقولوله عيب تبقى راجل شهم كـُبـــــــــــــــاره
وتلبس الشعب حدوه وبردعه وطرطـــــــــــــور

اهى حكمت المحكمة وبرضه هايستأنـــــــــــف
لما الحكايه بقت بايخه وكمان تقــــــــــــــــــرف
حد يقول للكتاتنى فى ودنه مايصحـــــــــــش
وارضى بحكم القانون من قبل ما تصيّـــــــــــف

اهى حكمت المحكمه وابو دقن بيكابــــــــــــــــر
ولأمتى هافضل كده على غـُلبهم صابـــــــــــــر ؟
خايف اشك فى ايمان الاخوه وسلوكهـــــــــــــــم
واسحب كمان الثقه من "سعد" و" الشاطـــــر"

اهى حكمت المحكمه يا اخونا فاضل أيــــــــــــه ؟
ومين كبيركم عشان نعرف نرد عليـــــــــــــــــــه
ولا اللى دقنه كبيره يبقى مالهش كبيـــــــــــــــــــر
ويبقى كل البلد على بعضها فى ايديــــــــــــــــــــه

فوضت امرى لربى وربكم فيكـــــــــــــــــــــــــــم
وداعيته عند الحرم بهدايته يهديكــــــــــــــــــــــــم
وفى ساحة السيده فرقت فول نابــــــــــــــــــــــــت
وداعيت فى سيدنا الحُسين تعمر على ايديكــــــــــم


يا المجلس العسكرى حضرة سيادتك فيــــــــن
ما تعدل انت وشوف الماده رقم ستيـــــــــــــن
وخلى واحد فقيه دستورى يشرحهـــــــــــــــــا
لا احسن معالى الشيوخ فى اللجنة مش فاهمين